Latest Post


சசிகலா குடும்பத்தில் நடந்த 5 நாள் ‘மெகா ரெய்டு’ வருமான வரித்துறை கைப்பற்றியது, கண்டுபிடித்தது என்ன?

சசிகலா குடும்பத்தாருக்கு சொந்தமான 187 இடங்களில் கடந்த 5 நாட்களாக வருமான வரித்துறையினர் நடத்திய ‘மெகா’ ரெய்டில் சிக்கிய விவரங்கள் தற்போது கசிந்துள்ளன.

இந்த ரெய்டில் வருமான வரித்துறையினர் வசம் ஏராளமான ஆவணங்கள், நகைகள், பணம், வரி ஏய்ப்பு செய்ததற்கான ஆவணங்கள் கைப்பற்றப்பட்டுள்ளன.

மறைந்த முன்னாள் முதல்வர் ஜெயலலிதாவின் தோழி, சசிகலாவின் குடும்பத்தினர், உறவினர்கள் வீடுகளில் கடந்த 9-ந் தேதி முதல் 13ந்ேத தி வரை வருமானவரித்துறையினர் மெகா சோதனையில் ஈடுபட்டனர். ஏறக்குறைய 187 இடங்களில் நடத்தப்பட்ட இந்த சோதனையில் 1800 அதிகாரிகள் ஈடுபட்டுள்ளதாகக் கூறப்பட்டது.

சென்னை, மன்னார்குடியில் துவங்கி, ஐதராபாத், பெங்களூரு ,  புதுச்சேரி ஆகிய இடங்களில் சசிகலாவுக்கும், உறவினர்களுக்கும் சொந்தமான வீடுகளில் சோதனை நடந்தது.

சசி குடும்பத்தின் பிடியில் உள்ள, ஜெயா, 'டிவி' மற்றும், 'மிடாஸ்' சாராய ஆலையிலும், தினகரனின் வீடு, மன்னார்குடியில், திவாகரன் வீடு மற்றும் அவர்களது சொந்தங்கள் மற்றும் நண்பர்கள் வீடுகள், அலுவலகங்கள் ,பணியாளர்கள் வீடுகள் , ஜாஸ் சினிமாஸ் அலுவலகங்கள், கல்லூரிகள் உட்பட 187 இடங்களில் தொடர் வருமான வரி சோதனைகள் நடந்தன.

முதல்கட்டமாக அதிமுக அம்மா அணியின் பொதுச் செயலாளரான சசிகலாவின் உறவினர் மருத்துவர் சிவகுமார், புகழேந்தி ஆகியோர் வருமான வரித்துறை அலுவலகத்தில் விசாரணைக்கு இன்று ஆஜரானார்கள். பின்னர் சசிகலாவின் சகோதரர் திவாகரன், ஜெயலலிதாவின் உதவியாளர் பூங்குன்றன் ஆகியோருக்கும் நேரில் ஆஜராக சம்மன்கள் அனுப்பப்பட்டு விசாரணை நடந்து வருகிறது.



இந்நிலையில் திடீர் திருப்பமாக சசிகலாவின் அண்ணன் மகனும், ஜெயா டிவி, ஜாஸ் சினிமாஸ் நிர்வாக இயக்குனருமான விவேக் ஜெயராமனும் விசாரணைக்கு அழைத்துச் செல்லப்பட்டுள்ளார். இந்நிலையில், இந்த 5 நாள் ரெய்டில் வருமானவரித்துறைக்கு கிடைத்துள்ள விவரங்கள், கண்டுபிடிப்புகள் குறித்து தகவல்கள் கசிந்துள்ளன.

1. ரூ. ஆயிரம் கோடி வரி ஏய்ப்பு
தி ஏசியன் ஏஜ் இணையதளம் வௌியிட்டுள்ள செய்தியில், “ சசிகலாவும், அவரின் குடும்பத்தினர்களும் ரூ. ஆயிரம் கோடி அளவுக்கு வரி ஏய்ப்பு செய்துள்ளனர். போலியாக பல நிறுவனங்களை நடத்தி, 50 வங்கிக்கணக்குகள் மூலம் பணப்பரிமாற்றம் செய்துள்ளனர். ஏராளமான போலி நிறுவனங்களை நடத்தி, குறைந்த முதலீட்டில் இயக்கியுள்ளனர். ஏறக்குறைய ரூ.6 கோடி ரொக்கப்பணம், 8.5 கிலோ தங்க நகைகள் கைப்பற்றப்பட்டுள்ளதாக’’ அதில் குறிப்பிடப்பட்டுள்ளது.

100 வங்கிக்கணக்குகள் முடக்கம்
இளவரசியின் மகன் விவேக் ஜெயராமன், ஜெயா தொலைக்காட்சியின் மேலான் இயக்குநராக இருந்து வருகிறார். இந்த ரெய்டில் முக்கியமானநபராக கருதப்பட்டவர் விவேக் ஜெயராமன். டைம்ஸ் ஆப் இந்தியா நாளேடு வெளியிட்டுள்ள செய்தியில், “ விவேக் ஜெயராமனுக்கு சொந்தமாக போலி நிறுவனங்கள் தொடங்கப்பட்டு, 100 வங்கிக்கணக்குகள் செயல்பட்டது தெரியவந்துள்ளது. இந்த வங்கிக்கணக்குகள் அனைத்தையும் முடக்கியுள்ளனர்’’ எனத் தெரிவித்துள்ளது. 

ஆனால், விவேக் ஜெயராமன் தரப்பினர் மறுக்கின்றனர். அவர்கள் கூறுகையில், “ எந்தவிதமான வங்கிக்கணக்கையும் வருமானவரித்துறையினர் முடக்கவில்லை’’ என்று தெரிவித்தனர்.

இது குறித்து வருமானவரித்துறை வட்டாரங்கள் கூறுகையில், “ விவேக் வீட்டில் இருந்து போலி நிறுவனங்கள் தொடர்பான ஏராளமான ஆவணங்களைக் கைப்பற்றி இருக்கிறோம். அவரின் சகோரி கிருஷ்ணப்பிரியாவின் வீட்டிலும், தணிக்கையாளர்  வீட்டில்  இருந்தும் ஏராளமான ஆவணங்களை எடுத்துள்ளோம். இந்த சொத்துக்கள் பினாமியுடையதுதானா என்பது குறித்து ஆய்வு செய்து வருகிறோம்.

மகளிர் விடுதியில் சிக்கிய ஆவணங்கள்..
சசிகலாவின் சகோதரர் திவாகரன் மன்னார்குடி அருகே சுந்திரக்கோட்டையில் செங்கமலத் தாயார் அறக்கட்டளை மூலம் மகளிர் கல்லூரி ஒன்று நடத்தி வருகிறார். இந்த கல்லூரியில் வருமானவரித்துறையினர் நடத்திய ஆய்வில் பலகோடிகள் மதிப்புள்ள சொத்துக்களின் ஆவணங்கள், மகளிர் தங்கும்விடுதியில் பயன்படுத்தப்படாத அறையில் இருந்து கண்டுபிடிக்கப்பட்டுள்ளன. அந்த அறை கல்லூரி முதல்வர் அறைக்கு அருகே இருந்தது என்று வருமானவரித்துறைனர் தெரிவிக்கின்றனர்.

இது குறித்து பெயர் வெளியிட விரும்பாத வருமானவரித்துறை அதிகாரி ஒருவர் கூறுகையில், “ இப்போதுள்ள நிலையில்  கைப்பற்றப்பட்ட சொத்துக்களின் மதிப்புகள், நகைகள், பணம் ஆகியவை குறித்து அறிக்கை ஏதும் வெளியிடக்கூடாது. இந்த ஆப்ரேஷன் மற்றும் ஆவணச்சரிபார்ப்பு முடியும் வரைஏதும் கூறக்கூடாது. ஆனால், பலகோடி மதிப்புள்ள சொத்துக்கள் தொடர்பான ஆவணங்கள், தங்கம், விலைமதிப்புள்ள பொருட்கள் கைப்பற்றப்பட்டன. அதனை மதிப்பீடு செய்யும் பணி நடந்து வருகிறது’’ என்றார்.


பருத்தி நூலுக்கு ஜி.எஸ்.டி. வரி விதிப்பில் இருந்கு விலக்கு அளிக்கக் கோரி, ஈரோட்டில் 5 ஆயிரத்திற்கும் மேற்பட்ட ஜவுளி கடைகளை அடைத்து வியாபாரிகள் 3வது நாளாக போராட்டத்தில் ஈடுபட்டுள்ளனர்.
பருத்தி நூலுக்கு 5 சதவீதமும், பாலிஸ்டர் நூலுக்கு 18 சதவீதமும் ஜி.எஸ்.டி வரி விதிக்கப்பட்டுள்ளது. அத்துடன், உற்பத்தி செய்த ஜவுளிப் பொருட்களுக்கு 5 சதவீதம் வரி விதிக்கப்பட்டுள்ளது. இதனால், ஜவுளித்துறை பெரும் பின்னடைவை சந்திக்கும் நிலை ஏற்பட்டுள்ளதாகக் கூறி, ஈரோட்டில் ஜவுளி வியாபாரிகள் கடைகளை அடைத்து 3வது நாளாக போராட்டத்தில் ஈடுபட்டுள்ளனர். இதனால், 90 கோடி ரூபாய் வரையிலான வர்த்தகம் பாதிக்கப்பட்டுள்ளது.
இதேபோல, பருத்தி நூலுக்கும், விசைத்தறி ஜவளித் தொழிலுக்கும் ஜி.எஸ்.டி.வரிவிதிப்பில் இருந்து விலக்கு அளிக்கக் கோரி, கரூரில் நெசவு மற்றும் பனியன் தொழிற்சாலை உரிமையாளர்கள் சங்கத்தினர் 3வது நாளாக வேலைநிறுத்தப் போராட்டத்தில் ஈடுபட்டுள்ளனர். இதனால்15 கோடி ரூபாய் வர்த்தகம் பாதிக்கப்பட்டுள்ளதோடு, 10 ஆயிரம் தொழிலாளர்கள் வேலையிழந்துள்ளனர்.


ஆசியான் கூட்டமைப்பில் இடம்பெற்றுள்ள 10 நாடுகளின் அரசுத் தலைவர்களை வரும் குடியரசு தின விழாவிற்கு அழைக்க மத்திய அரசு திட்டமிட்டுள்ளது. தென்கிழக்கு ஆசிய நாடுகளின் கூட்டமைப்பான ஏசியானில், புரூனை (Brunei), கம்போடியா, இந்தோனேசியா, லாவோஸ், மலேசியா, மியான்மர், பிலிப்பைன்ஸ், சிங்கப்பூர், தாய்லாந்து, வியட்நாம் ஆகிய 10 நாடுகள் இடம்பெற்றுள்ளன.
இந்த 10 நாடுகளின் அரசுத் தலைவர்களையும் வரும் குடியரசு தின விழாவிற்கு அழைக்க மத்திய அரசு திட்டமிட்டுள்ளது. அப்படி அழைக்கப்பட்டால், வரும் குடியரசு தின விழா, 10 நாடுகளின் அரசுத் தலைவர்கள் கலந்துகொள்ளும் முதல் குடியரசு தின விழாவாக அமையும்.
ஆசிய நாடுகளுடனான உறவை வலுப்படுத்திக் கொள்ளும் நடவடிக்கையாக மத்திய அரசு இந்த முடிவை எடுத்துள்ளது. தென்சீனக் கடல் எல்லை தொடர்பாக வியட்நாம், பிலிப்பைன்ஸ், மலேசியா, புரூனை ஆகிய நாடுகளுடன் சீனா சர்ச்சையில் ஈடுபட்டுள்ள நிலையில், ஆசியான் கூட்டமைப்பு நாடுகளை குடியரசு தின விழாவுக்கு அழைக்கும் இந்தியாவின் முடிவு முக்கியத்துவம் பெறுகிறது.


ஜி 20 உச்சி மாநாடு, முதலாளித்துவம், உலக மயமாக்கலுக்கான நடவடிக்கை என்று கூறி ஒரு தரப்பினர் கடும் எதிர்ப்பு தெரிவித்து வருகின்றனர்.
கடும் எதிர்ப்புக்கு இடையே ஜி20 மாநாடு நேற்று ஜெர்மனியின் ஹாம்பர்க் நகரில் தொடங்கியது. மாநாட்டை எதிர்க்கும் மக்கள், “தலைவர்களை நரகத்திற்கு வரவேற்கிறோம்” என்ற பெயரில் போராட்டங்கள், ஊர்வலங்கள் நடத்தி வருகின்றனர். ஹேம்பர்க் நகர் முழுவதும் 20 ஆயிரம் போலீசார் பாதுகாப்பு பணியில் ஈடுபடுத்தப்பட்டுள்ளனர். ஏராளமானவர்கள் போராடி வரும் நிலையில் நேற்று போராட்டக்காரர்கள் கார்களுக்கு தீ வைத்தனர். இரவிலும் போராட்டத்தில் ஈடுபட்ட அவர்கள், கடைகள், மற்றும் சாலையில் இருந்த பொருட்களுக்கு தீ வைத்தனர்.
போராட்டம் தீவிரம் அடைந்ததால் சிறப்பு படையினர் அதிகளவில் வரவழைக்கப்பட்டனர். கண்ணீர் புகை குண்டு துப்பாக்கிகளுடன் வந்த அவர்கள் போராட்டக்காரர்களை விரட்டியடித்தனர். தண்ணீரை பீய்ச்சி அடித்தும் போராட்டக்காரர்களை அவர்கள் கலைக்க முயன்றனர்.
போராட்டத்தின் போது காவல்துறையினர் 159 பேர் காயம் அடைந்திருப்பதாகவும், போராட்டக்காரர்களில் 45 பேர் கைது செய்யப்பட்டிருப்பதாகவும் அதிகாரிகள் தெரிவித்துள்ளனர். போராட்டம் தொடர்வதால் ஹேம்பர்க் நகர் முழுவதும் காவல்துறையினரின் கட்டுப்பாட்டிற்குள் கொண்டுவரப்பட்டுள்ளது.


ஈராக்கில் மொசூல் நகரை ஐ.எஸ் தீவிரவாதிகளிடம் இருந்து கைப்பற்றும் போர் முடிவடைந்துள்ளது.
ஈராக் படைகள் ஒருபுறம் போரிட்டுக் கொண்டிருக்க, மறுபுறம், ஐ.எஸ் படையினர் மீது அமெரிக்க இராணுவ விமானங்கள் வான்வழித் தாக்குதல் நடத்தின. இந்நிலையில், ஒன்பது மாதங்களுக்குப் பிறகு மொசூல் நகரத்தை ஈராக் அரசு கைப்பற்றியுள்ளது. இனி மொசூல் நகரை மறுகட்டமைப்பது என்பது பிரதமர் ((Haider al-Abadi)) ஹைதர் அல்-அபாதிக்கு ஒரு பெரும் சவால் என கருதப்படுகிறது. அத்துடன் ஐ.எஸ் அமைப்பினர் மீண்டும் பலம் பெற்று விடாமல் தடுக்க வேண்டிய பொறுப்பும் பிரதமருக்கு உள்ளது.


ஒலிம்பிக் போட்டியில் வெள்ளிப்பதக்கம் வென்ற பேட்மிண்டன் வீராங்கனை பி.வி.சிந்துவுக்கு இந்த ஆண்டுக்கான விளையாட்டு நட்சத்திரம் விருது வழங்கப்பட்டது.
டெல்லியில் நடைபெற்ற விழாவில் பி.வி.சிந்து இந்த விருதைப் பெற்றுக் கொண்டார். அவருடைய பயிற்சியாளர் கோபிசந்துக்கு சிறந்த பயிற்சியாளர் விருது அளிக்கப்பட்டது. தடகள வீரர் மில்கா சிங்குக்கு “வாழும் வரலாறு” விருது அளிக்கப்பட்டது. ஆயினும் அவரால் அந்த விழாவுக்கு வர இயலவில்லை. ஆஸ்திரேலியாவுக்கு எதிரான டெஸ்ட் போட்டியில் முத்திரை பதித்த கிரிக்கெட் வீரர் ராகுலுக்கு கேம் சேஞ்சர் விருதும், துப்பாக்கிச்சுடும் வீரர் அபிநவ் பிந்த்ராவுக்கு வாழ்நாள் சாதனையாளர் விருது வழங்கப்பட்டது. மாரியப்பன் தங்கவேலு, வருண் பாரதி, தீபாமாலிக் உள்ளிட்டோரும் இந்த விழாவில் கௌரவிக்கப்பட்டனர்.


காஷ்மீரில் எல்லைக்கு அப்பால் இருந்து பாகிஸ்தான் ராணுவம் அத்துமீறி நடத்திய தாக்குதலில், விடுப்பு எடுத்து வீட்டில் இருந்த ராணுவ வீரர் மற்றும் அவரது மனைவி குண்டடி பட்டு உயிரிழந்தனர்.
ஜம்மு காஷ்மீர் மாநிலம் பூஞ்ச் மாவட்டத்தில், எல்லைக் கட்டுப்பாட்டு கோட்டருகே பாகிஸ்தான் ராணுவத்தினர் இன்று காலை முதல் தொடர் அத்துமீறலில் ஈடுபட்டு வருகின்றனர். சக்கா டா பாஃக், (chakka da bagh) கார்ரி கர்மாரா (kharri karmara) ஆகிய பகுதிகளில் இந்திய நிலைகளை குறிவைத்து அவர்கள் சிறிய ரக பீரங்கிகளால் தாக்குதல் நடத்தி வருகின்றனர். பாகிஸ்தான் ராணுவத்தினரின் தாக்குதலில் பூஞ்ச் பகுதியில் வசித்து வந்த கணவன் – மனைவிக்கு குண்டடி பட்டு இருவரும் உயிரிழந்தனர்.
உயிரிழந்தவர் ராணுவ வீரர் முகமது சவ்காத் என்றும், அவர் விடுப்பு எடுத்து வீட்டில் இருந்த போது தாக்குதலில் உயிரிழந்து விட்டதாகவும் ராணுவ தரப்பு தெரிவித்துள்ளது. எல்லையில் பாகிஸ்தான் ராணுவத்துக்கு இந்திய ராணுவத்தினர் தக்க பதிலடி கொடுத்து வருவதாகவும், காலை ஆறரை மணி முதல் எல்லையில் சண்டை நீடித்து வருவதாகவும் அதிகாரிகள் தெரிவித்துள்ளனர்.

Author Name

{picture#YOUR_PROFILE_PICTURE_URL} YOUR_PROFILE_DESCRIPTION {facebook#YOUR_SOCIAL_PROFILE_URL} {twitter#YOUR_SOCIAL_PROFILE_URL} {google#YOUR_SOCIAL_PROFILE_URL} {pinterest#YOUR_SOCIAL_PROFILE_URL} {youtube#YOUR_SOCIAL_PROFILE_URL} {instagram#YOUR_SOCIAL_PROFILE_URL}

தொடர்பு படிவம்

பெயர்

மின்னஞ்சல் *

செய்தி *

Blogger இயக்குவது.